لمن تبقى لديهم من النخوة ،،

هــــــــــــــــــــــــام

لكل أحبائى واخوانى المصريين

وصلنى مرة ايميل عبارة عن صور لمصر ،،

ولكنها سيئة جدا ولا تعطى إلا أسوأ إنطباع عن بلدنا

وأغلبكم إن لم يكن جميعكم وصله نفس الإيميل ..

وتكرر كتير المضمون باختلاف الصور و كيفية التشوية ..!!

والكارثة أن مروجى هذه الرسائل هم مصريين ( ولو ظاهراً )

للدرجة دى أصبحنا حاقدين و ناقمين على بلدنا ؟؟

عمركم شفتوا بلد أغنى وأكرم و أحلى من مصر !!!؟؟

ومع ذلك ما فى حد بيشتم فى بلده غير المصريين !!!؟؟

ممكن يا جماعة نتفق اتفاق مهم جدا بس ياريت تركزوا معايا ،،

عاوزة أسألكم سؤال ,,

هل مصر تستحق منا ذلك ؟؟

هل فعلا مصر سيئة للدرجة دى ؟؟

بلدنا وحشة واحنا لازم ننشر ده على النت لكل العالم ..!!

هل احنا وحشين ؟؟

اظن " لأ " هى إجابة أول 3 أسئلة

وإجابة آخر سؤال هى " نعم بالتأكيد "

ولا انتم مش معايا ؟

يا جماعة انا بعترف اننا بنعيش أزمات كتير

وفى بلاد كتير جدا كانت أسوأ منا و صارت أفضل بكتير

كمثال : اليابان اللى كانت متاخرة عنا 50 سنة وأكتر

حاليا هى فين و إحنا فين ..؟

وكمان مصر مواردها ماشاء الله و خيرها كتير جدا جدا ..

خير يعيشنا ملوك

ورغم ده كله مش عارفين نعيش كويس و تعبانين

بس ده ذنب مين ؟

هل ده ذنب الوطن ؟

طول عمرها بتتسرق ورايح دمها هدر ومازالت صامدة ،،!!

يبقى هى مذنبه واحنا الضحايا !!

جوانا ضغط كتير وألم ميحسش بيه غير اللى عايش ظروفنا

شباب مش لاقى شغل ..!!

مش لاقى يتجوز ..!!

مش لاقى ياكل ..!!

مشاكل كتير أسبابها كتير ،،

يمكن اهمها نقص الدين او كلها بتصب فى هذا المنحدر ..!!

عاوزين نعترض نثور نصرخ

نعمل اى حاجه نفرغ بيها شحنة الكبت اللى جوانا بدل ما ننفجر

( ده لو مكناش انفجرنا بالفعل ..! )

انا معاكم الشحنة دى لازم تتفرغ لكن لازم نفكر كويس ،،

عشان نفرغها صح وتجيب نتيجة كويسة

ترضينا و تزيح عننا الهم او جزء منه مش تزيده ..!

لحد هنا متفقين ..؟

كويس

فى ناس حبت تاخد الخطوة الايجابية .. جميل

ناس مش عاوزة تخرس ألسنتها و عاوزة تتكلم لحسن تطق ..

جميل جدا

الناس دى عملت ايه ؟

اتصرفت ازاى يمكن نحب نقتدى بيهم

للأسف

ناس خدت رد فعل لمجرد انه رد فعل

مش سعياً لهدف محدد او نتيجة ايجابية

الناس دى اتاخرت شوية فى اتخاذ الخطوة الأولى

ولما بدأوها .. بدأوها غلط ..!

ولذلك استفحلت حالتهم واتقلب الشعور اللى جواهم من الضغط فقط ،،

للكره والحقد على

أمهم

وطنهم

بدايتهم و نهايتهم

وفقدوا الشعور بالإنتماء والإخلاص

بدأوا يشوهوا صورة مصر

ينشروا كل ما يسىء لها من صور

يفضحوا نقاط الضعف

رغم إن ده مش شعورهم من الأصل

ولكنهم أصبحوا وبمنتهى السهولة آداه فى يد الحاقدين الأساسيين

_ بدون الخوض فى تفاصيل او توضيحات _

لمجرد إضعاف النفوس المصرية

وسلب كل ما هو معنوى وفى صاالح الوطن الأكبر

لاحباط الشعب و سلب القوى الداخليه

اجمل حاجه فى المصرى هو تمسكه بوطنه وتعزيزه عن اى شىء

وهو ده سر انتصاراتنا فى كل الميادين

وسلب حب الوطن و إهدار مكانته وكرامته داخل الإنسان المصرى

من جملة أساليب الحرب النفسية المتبعة مع لشعب المصرى ،،

وياريتنا نصمد

ده كله لصالح مين ؟لصالح مين

نشوه بأيدينا أجمل صورة فى

أجمل صورة فى حقيقتنا و خيالنا

وننزع عن قلوبنا رداء الوطنية

ونفقد هويتنا المصرية

لــيـــــــــــــــــــــــــه ؟؟

هنكسب أيه لما نخسر نفسنا

هنكسب أيه لما يكون تفريغ غضبنا عباره عن حقن سم

فاكرين اننا بنعالج بيها بعض ..!!

الغضب الاعمى و السخط والكراهيه عمرها ما كانت حلول سليمة ايجابية

وخصوصا لما يكون وطننا ملوش ذنب

وحتى لو ليه ذنب ؟؟

هو فى حد يتخلى عن وطنه و يشتمه علنا

وكأنه عامل دعوة عالمية" للسب المفتوح "..!

يا جماعة ده الواحد فينا لو متخانق مع والده أو والدته مش بيروح يشتم فيهم للجيران

مهما عملوا فيه حتى ولو قتلوه ،، بيفضلوا أهله

ولو حصل ,,, أول وأقل حاجة بتتقال " ده قليل الأدب "

طيب احنا مش قليلى الأصل عشان نشتم فى بلدنا علنا

و نخلى الناس كمان تشتم معانا ..

يعنى لو انا قبلت الغضب ده من واحد مصرى هقدر ظروفه ..

لكن مش هقبل واحد مش مصرى يشتمنى فى بلدى او فى حد من اولاد وطنى

قال المثل :

" أدعى على ولدى ،، واكره اللى يقول آمين"

طالما احنا بنشتم مش هنقدر نمسك افواه و ألسنة الآخرين

يعنى بكل الأحوال هنتشتم أكتر ما بنتشتم ,,

ساعدونى و ساعدوا أنفسكم

انا عاوزة مساعدة بجد

ومش أنا لوحدى

أنا و كل مصرى ومصرية

أنا و أنتم ومصر وكل المصريين

لازم نساعد بعض

يمكن نرد جزء من واجبنا تجاه وطننا الأم

يمكن نعوض بيها جزء من كرامتنا المجروحة

يمكن نلاقى حق مضاعش وسط الحقوق المهدورة

يمكن نحس إننا آدميين لينا حق نكون محترمين

مش هنفقد كل شىء حتى إعتبارنا وإنتمائنا

وحقنا فى الدفاع عن بلدنا المظلوم أكتر مننا ..

خلينا ناخد الخطوة الإيجابية الصح

خلينا نشتغل فى الإتجاه الصح

خلينا نرفع من شأن مصر

خلينا نرفع الروح المعنوية لبعض و لكل المصريين

خلينا نلاقى حل بجد

اول حاجه علشان نقدر نفكر صح مش لازم نساعد على نشر الصور المسيئة

مش صح نشكر ونتبسط و نضحك مع الغافلين

اوعى تشوف إيميل من ده و تضحك من قلبك

وتبعته لأصحابك بسرعة عشان يضحكوا

وتقول

only in egypt

عيب

عيب

عيب

انت بتضحك على نفسك

بتضحك على عجزك

بتضحك على اللى بيبكيك

فوووق

ياريت كلنا نفوق

ياريت نعمل حاجه واحدة صح

لو ما قدرناش ننجز فى بلدنا

او نبنى ولا حتى نرص قالب طوب

بلاش نهدم

بلاش نحبط البنائين

بلاش بدل ما نبنى بالطوب نحدف بيه بعض ..!!

ده إحنا أخوات فى الأول و الآخر

بلاش نقطع فى جسد كان السبب الأول فى وجودنا وحياتنا

رعانا واحنا صغيرين

ولما شاخ هاجمناه و اتهمناه بالعجز .. ذنبه أيه ؟؟!!

اخدنا كتير كتير وده وقت العطاء

حتى لو شايف نفسك ما أخدتش حاجة

ليه ماتكونش انت العطّاء

ليه حابب تكون انانى ..!!

مش هعطى لأنى ما أخدتش .!

مش منطق

ده واجب ،، وإن لم يكن واجباً فهو فرض .

إحنا الغلطانين

إحنا الإتكاليين

إحنا اللى عاوزين نعيش ملوك من غير ما نتعب ولا نعمل بالدين

بلاش نفضل مقصرين فى حق نفسنا

حق بعض و حق وطننا

ده لو مكانش غالى ومكانته عالية عند الله

ما كان جعل الموت فى سبيله من أعلى درجات الشهادة

اخوانى اتفقنا نمنع الصور المسيئة لبلدنا

خلينا كمان نفخر اننا مصريين

مين فى العالم بلده مذكورة فى القرآن

غيرمكة و مصر

بِسْمِ اللّهِ الرَّحْمَنِ الرَّحِيمِ

فَلَمَّا دَخَلُواْ عَلَى يُوسُفَ آوَى إِلَيْهِ أَبَوَيْهِ وَقَالَ ادْخُلُواْ مِصْرَ إِن شَاء اللّهُ آمِنِينَ (99)

يوسف

خلينا نعرف قيمة وطننا و قيمة نفسنا

خلينا نحس بكرامتنا و عزتنا

خلينا ننشر كل الصور الحلوة لمصر

مصر مش كلها وحش

ومفيش بلد فى العالم كله حلو و جميل ومرتاح

البلاد زيها زى البيوت

فيها حلوها و مرها

حلوها لازم يبان ومرها تتقفل عليه البيبان

اتعودنا مشاكلنا ماتخرجش من باب بيتنا

ولا غسيلنا الـ..... يتنشر قدام ولاد حتتنا

واحنا بلدنا زى كل بلد

فيها الحلو و الوحش

لكن خلينا احنا نعمل حملة نعاكس فيها اعداء اهلنا واعداء أنفسهم

هننشر صور جميلة لمصر ونوريها لكل العام

ونعرفهم تاريخ مصر

ونقول هى دى مصر

هى دى بلدنا

اللى افتخرنا و بنفتخر و هنفضل طول عمرنا نفتخر

اننا أولادها،، وأنها أمنا ،،

Dynameta

لحد دلوقتى لسه مكرهتش الدنيا :(

انا مش عارفة هى ليه بتضيق كدا من كل ناحية ..!
بصوا انا مش كارهه الدنيا فعلا لكن قريب هكرهها
احنا لحد دلوقتى مستحملين بس لامتى ؟؟؟؟؟؟؟؟؟؟
اول شىء
انا عاوزة اقولكم انى مش بشرب دلوقتى الا نادرا
يمكن اكون بشرب شاى بلبن اكتر ما بشرب المياه
مش عارفة ميه الحنفية دى جاية منين ولا بيحطوا فيها ايه
الله_ لا_ يسامحهم
انا لما اجى اشرب غصب عنى بشم المية بقرف اشرب
ولوعطشانة جدا وعملت مش شامة حاجة بحس بطعمها مررر
هى المية دى جاية من ترعة مثلا ؟؟؟
دى لو جاية من ترعة مش هتبقى كدا برضه
مهو مستحيل تكون دى مية النيل اللى بتغنيلها ومزهقانا منها شيرين هانم
ومش ممكن يكونوا برضه مستكترين علي الشعب يشرب فبيسمموها !!!!!!!
مش كفاية مفيش عيش .. كمان المية؟!!!!!
انا عندى اعتقاد غريب وما غريب الا _ لا شوشو مبقاش غريب عننا خلاص دا واحد من الناس _
المهم انا بحس انهم بيجيبوا المية المستعملة _!!_ ويحللوها و يحلوها
و يرجعوها لاصلها ويبعتوها لنا فى الحنفيات تانى ( خيال علمى !)
بس كل شىء متوقع فى الزمن ده ومع الناس دى ..
انا نفسي افهم ايه المطلوب من الشعب .. يعمل ايه اكتر من اللى بيعمله
سرقة و بيسرق نهب وبينهب شحاته مفيش اكتر من كدا
نصب و احتيال وقايم بالواجب تمام التمام ... رغم ان فى فئة معينة احتكرت الكار ده لنفسها بس اهو موجود برضه
نعمل ايه تانى عشان نعيش كويس
واللى مش قادر يعمل كدا يعمل ايه ؟
ياريت كان الانتحار مش حرام كان فى ناس كتير هتلاقى حل لمشاكلها
خصوصا ان الايمان شح اليومين دول ومحدش بقى قادر يتحمل والوقوع فى الحرام اسهل من رغيف العيش
هو ده اللى هما عاوزينه ...
حسبى الله و نعم الوكيل فى اللى اخترناه اخترناه
فى رقبة مين ذنب مرضى الفشل الكلوى !!

يعنى ده لو رسيت على كدا بس ( خيال علمى برضه !)

ده واحد من مليون حاجة ممكن تخلينى اكره الدنيا

لكن هنتحمل انتظارا لوعد الرحمن الرحيم

بِسْمِ اللّهِ الرَّحْمَنِ الرَّحِيمِ

فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6) .

المترو و ...... واللى بيحصل فيه

بصراحة اكتر حاجه بكرهها هى الزحمة

والناس دلوقتى ملهاش عدد _ رغم انى بتكلم عن الناس اللى بشوفهم الساعة 8 مثلا

ودول غير اللى راكبين حاجات تانية غير المترو واللى لسه فى البيوت

واللى مبينزلوش خالص من البيت

وعموما مش الزحمة هى المشكلة ..الواحد ممكن ميحسش بيها لو كان فى نظام

لكن اظن محدش فى الشارع يعرف يعنى ايه نظام ..!!

و يعنى ايه التزام بالقواعد اللى تخلينى ارتاح و اريح غيرى فى الطريق :(

كله بيقول يلا نفسى وبس .. رغم انه لو احترم النظام هيرتاح فعلا و ينجر اكتر فى وقت اقل

طبعا مش هتكلم عن الطرق العامة لان دى حدث ولا حرج وبيحصل فيها اللى بيحصل فى السيرك بالظبط

لكن بقصد فى كلامى " المترو " ..

محدش هيعرف حجم المعاناة اللى بيعانيها ركاب المترو الا اذا كان منهم بالفعل

اول الفظائع اللى بشوفها وبتضايقنى جدا

الهجوم

الناس بتقف قدام الباب وتفضل تزق كأنهم هيقصوا الشريط مثلا ولا كأن هما اللى هيفتحوا الباب

وكل ده عشان يلحقوا يقعدوا ( بيفكرونى بلعبة الكراسى الموسيقيه )

ويدخلوا جوا يقعدوا يخبطوا فى بعض وعنيهم تجيب العربيه من أولها لآخرها بحثاً عن الكرسى الخالى :((

طيب يعنى هما لو مقعدوش هيجرالهم ايه يعنى ؟!! مش هيوصلوا مثلا ؟

مهو مش معقول تعبانين اوى كدا يعنى .. بعد الضهر ماشى هنقول راجعين من شغلهم و جامعاتهم تعبانين

لكن الساعة 8 دول لسه قايمين من السرير مفيش ساعة لحقوا يتعبوا !!

ويا سلااام على ملامحهم بعد ما يقعدوا .. سعادة غامرة جدا بالانتصار طبعا

وفى الغالب اول ما الواحدة تقعد تغمض عنيها وتكمل نوم بقى

عشان لا تشوف واحدة حامل ولا ست كبيرة ولا واحدة شايلة طفل

لان كل دى اسباب " فقدان " الكرسى ..!

اكيد بتكلم عن عربية السيدات لانى من ركابها .. اما العربية المختلطة بقى دى موال تانى خالص

زى ما يكونوا الرجال بينتقموا من وجود عربية مخصصة للسيدات فبيدخلوا العربيات التانية ويعتبروها حق مكتسب

ويتعاملوا على هذا الاساس ،،

بمعنى انه لو شاف واحده ست ولا يقوم ولا يتهز ولا كانه ناسى قاعدة اخلاقيه و ذوقيه هامة

بحجة ايه بقى ؟ قال ايه هما ليهم عربيه مخصوص يركبوا معانا هنا ليه ؟!

هو ميعرفش ان عربية السيدات دى بتبقى عاملة زى علبة السلامون _ ولا يعرف ان هى للسيدات اللى مش عاوزين اختلاط تماما

رغم ان فى سيدات ميشغلهمش الموضوع ده اصلا وممكن يركبوا العربيات الباقية ،، فده مش سبب ابدا يعنى

ولا العربيات دى حكر ليهم .!

ومش بس ميقومش ليها .. ده بيسابقها على الكرسى كمان ،، ايه الذوق العالى ده !

بس من ناحية اخرى انا بعذر الرجال فى الموضوع ده بنسبة بسيطة لاسباب يمكن اقولها فى وقت تانى

لكن فى الاخر هقول كله بيعمل بأصله .

من ضمن التصرفات السيئة اللى بتحصل انه فى وسط الزحمة دى تلاقى اللى عاوزين يركبوا يقفوا قدام الباب واول ما يفتح يرموا نفسهم على اللى عاوزين ينزلوا ،، طيب ده كلام ..!!

لا اللى نازل بيعرف ينزل ولا اللى راكب بيعرف يركب و الباب بيقفل عليهم .. يبقى غباء ده ولا لأ ؟

بجد تصرفات لو الواحد قابلها قدام عينه هيتغاظ مش مجرد انه يسمعها وبس .

ما الناس لو فكرت ولا حتى من غير ما تفكر لو بصوا تحت رجليهم هيلاقوا اسهم دخول و خروج اللى راكب يقف على السهم الاخضر

واللى هينزل من المترو يشوف باب النزول وباب الطلوع وكدا تتحل الازمة و ميكونش فى صدام بين اللى داخل و اللى خارج

واللى يغيظ اكتر انك تلاقى اتنين عاوزين يركبوا فى عز المعمعة دى و ماسكين ايد بعض ..!!!!!

والله الحاجات اللى تغيظ كتير وبالذات فى المترو ..

حاجة اخيرة بقى عشان انا طولت اوى ..

مش من الذوق ان واحده تقعد و تقعد اطفالها جنبها فى حين ان فى ناس تانى كبار فى السن واقفين و تعبانين .. ممكن تاخدهم على رجلها والناس تقعد ،، لانها كدا بتعلمه بدون قصد قله الذوق و عدم مراعاة الاخرين واحترامهم خصوصا انهم اكبر منه سنا ..

لكن مين ينتبه لحاجات زى دى طول ما مبدأهم " نفسى " ومن بعدى الطوفان .

طيب ،، يلا نبتدى

السلااااام عليكم
عارفة انى اتأخرت من ساعة اخر بوست كتبته بس الشديد القوى والله
تقدروا تقولوا انى مش بفتح الكمبيوتر اساسا فى البيت
( عرفتوا انا بكلمكم منين دلوقتى طبعا ،، بس خلوها فى سركم ;))
انا يوميا دلوقتى بنزل الشغل من 8 وبرجع 6 مؤكد مش بكون شايفة قدامى
خصوصا ان الطريق اساسا لوحدة ساعة ونص رايح وزيهم راجع
بس فى طريقى ده بشوف العجب بصراحة خصوصا فى المترو
لان ليه النصيب الاكبر فى طريقى
يمكن قبل كدا مكنتش باخد بالى من الناس اوى لانى مكنتش بنزل من البيت كتير ولو نزلت
بيبقى مكان قريب جدا من البيت فمكنتش بشوف اللى بشوفه دلوقتى
لكن ميمنعش انى لما كنت انزل مشوار بعيد شويه كنت بتشل من المناظر اللى الواحد بيشوفها
واقول فعلا القعاد فى البيت ستر ..!!

الشعب فيه حاجات كتير جدا لازم تتغير ،، لان وجودها الى الان معناه قلة دين ...
وقلة ذوق..!

خصوصا فى البنات
يمكن حد بستغرب لان الناقد للجنس اللطيف دايما يكون رجل /شاب
او حتى واحدة-بس سنها كبير
مش واحده من نفس جيلهم
لكن الصح ميعرفش مجاملات ولا تحايل والغلط ملوش مبررات
انا شايفة حاجات كتير غلط يمكن تكون مش مهمة بالنسبة لناس او حاجة مش محتاجة وقفة
بالنسبالى هى محتاجة وقفة جامدة لان البنت عبارة عن سمعة وسلوك يتحكم عليها من خلالهم وانتهى الامر
فلو ما أخدتش بالها ممكن تحط نفسها فى صورة مش هتعجبها ،،، وترجع تزعل ..!

المهم ان الحاجات دى هفصلها عن بعضها وهقول كل نقطه لوحدها ولو الموضوع مش مستاهل اوى اننا نقف عنده قولولى
واهلا بكل الآراء ..

زهقت من قوقعتى

السلام عليكم ورحمة الله وبركاته
غايبة ليا كتير جدا جدا ونفسي كل يوم ادخل مدونتى لانها وحشتنى بس كنت زهقانه
ودلوقتى زهقت اكتر من ركنتها فقررت انى ارجع اسجل فيها
حتى لو هرغى رغى فاضى المهم اقول انا اهو واحس انى متواصلة مع العالم
هحاول انتظم و اقول كل اللى عاوزة اقوله حتى لو كان حصل وانتهى
بس ربنا يعين ..

سلام مؤقت

هى قلبت سياسة ولا أية ؟

مش عارفة ليه عاوزة أنقل لكم الاخبار اللى بقابلها ..

يمكن لان الاحداث مستفزة الى حد ما او بعض الحدود

عموما عشان ميختلطش عليكم الامر فالمدونة مش سياسية بحته لكنها تشمل كل المجالات

;) بس مش بعيد تبقى كدا مستقبلا

إقرأوا بقى

سكرتير عام نقابة الصحفيين: شيخ الأزهر أصدر فتوي ملاكي لعقاب الصحفيين
وصف يحيي قلاش سكرتير عام نقابة الصحفيين تصريحات شيخ الأزهر "بالتفسير لفتوي ملاكي لعقاب الصحفيين، دخل من خلاله شيخ الأزهر طرفا في لعبة الفتاوي السياسية ومواجهة الحريات العامة وتوظيفها في الجدل السياسي الدائر خاصة في القضايا المطروحة الخاصة بحبس أربعة رؤساء تحرير صحف بتهم مختلفة ومحاكمة إبراهيم عيسي بتهمة الترويج لشائعات حول صحة الرئيس".
وأضاف قلاش-حسبما أورده الموقع الرسمي للأخوان- أن هذا يعتبر مؤشرا خطيرا سيؤدي إلي الإساءة لسمعة مصر ونظامها السياسي الذي اقترب إلي الدول المتخلفة الجاهلة التي تحبس صحفييها وتعاقبهم علي التعبير عن آرائهم.
وصرح جمال فهمي بأن النقابة لن تستطيع إصدار بيان بشأن هذه التصريحات المخجلة لأنها كانت غير مباشرة ولم يطالب فيها بعقاب الصحفيين لكنه استغل الأحداث الجارية وبعض الآيات القرآنية والأحاديث النبوية التي تدعو للقصاص من مثيري الفتن ومروجي الشائعات-علي حد وصفه.
فيما أشار يحيي قلاش إلي أن ما قاله شيخ الأزهر "لن تستطيع النقابة إصدار بيان ردا عليه لصعوب جمع أعضاء المجلس في هذا التوقيت خاصة أن أغلبهم لا يرد علي التليفون، ولن يضطر في النهاية إلي إصدار بيان باسمه حتيلا يقال عليه إنه الحاكم بأمره والمنفرد بقراراته وآراء النقابة".
وأضاف قائلا: إذا أردتم معرفة رد فعل النقابة تحدثوا إلي أعضاء المجلس الذين لا يتواجدون إلا في المناسبات، واستمعوا إلي آرائهم

لعلها تكون لحماية الصحفيين من بطش النظام-علي حد قوله.

يعنى ملخص القصة ان الولاد بيعملوا شغب ،، فجت ماما استنجدت بعمو الشيخ عشان يخوف الولاد ويقولهم ربنا هيزعل منكم وعشان كدا اللى هيشاغب ويزعل ماما هنضربه بامر الله

:(

):

:(

):

يلا بينا على أيسلاندااااا

مصر تحتل المرتبة 146 بين 169 دولة في حرية الصحافة
القاهرة - سجلت مصر تراجعا جديدا في مجال حرية الصحافة، واحتلت المرتبة 146 من بين 169 دولة شملها التقرير الذي أصدرته الاربعاء منظمة مراسلون بلا حدود وأكد أن المنظمة اصيبت بخيبة الأمل عقب تقهقر ترتيب مصر.
وأشار إلي أن الصحافة المصرية واجهت أزمات متعددة خلال الفترة الماضية.
وانتقد التقرير اقامة دعاوي قضائية ضد الصحف المعارضة والمستقلة بسبب قيامها بنشر تجاوزات الشرطة وقيامها بتعذيب المواطنين خلال عمليات الاستجواب، كما انتقد قيام السلطات المصرية بملاحقة حرية التعبير علي شبكة الانترنت، مما أسفر عن
الحكم علي أحد المدونين بالسجن 4 سنوات، اضافة الي حجب واغلاق عدة مواقع اخبارية، حسبما ذكرت جريدة الوفد.
وأعربت منظمة مراسلون بلا حدود عن قلقها البالغ من الأوضاع السياسية في مصر وباقي الدول التي تنتهك حرية الصحافة مثل المغرب.
وأكدت أن الصحفيين يخضعون لرقابة شرسة، وأن وعود الاصلاح والافراج عن الصحفيين والمدونين مجرد أوهام.
وسجلت المغرب وتونس ترتيبًا متراجعًا بين الدول التي رصدها تقرير المنظمة.
جاءت المغرب في المرتبة 106 بسبب الاعتداءات المتكررة علي الصحفيين وتعرضهم التعذيب ومصادرة الصحف.
كما سجلت بعض دول الخليج تقدمًا ملحوظًا حيث احتلت الكويت المرتبة 63 والامارات المرتبة 65 بسبب الانفتاح وتعديل بعض القوانين نحو مزيد من الليبرالية وتراجعت المملكة العربية السعودية 20 درجة وجاءت في المرتبة 148.
وسجلت الدول الصناعية الثماني الكبري تحسنًا طفيفًا باستثناء روسيا، وتراجعت الولايات المتحدة إلي المرتبة 48.
وذكر التقرير أن ايسلندا هي الدولة الوحيدة التي تعيش حرية صحافة حقيقية، واحتلت المركز الأول علي مستوي العالم.
وأصدرت أمس لجنة حماية الصحفيين العالمية تقريرًا بعنوان الرجل المنسي تزامن صدوره مع مرور 4 سنوات عن اختفاء الصحفي رضا هلال.
وصفت اللجنة مصر بأنها إحدي أسوأ دول العالم في حرية الصحافة وأشارت إلي تزايد الاعتداءات ضد الصحفيين خلال السنوات الخمس الأخيرة.
وأعلن جويل سايمون المدير التنفيذي للجنة حماية الصحفيين، رفضه الواضح لموقف السلطات المصرية وتقاعسها نحو إظهار حقائق رضا هلال.
ودعا المسئولين المصريين إلي تقديم تفسير صريح لهذه الحادثة التي وصفها بأنها مفزعة وتنتهك أدني الحقوق الانسانية قبل المهنية.

رحنا وجينا بالسلامة

السلام عليكم ورحمة الله وبركاته

الحمد لله سافرت ورجعت بالسلامة ..

انتظروا احداث الرحلة وتفاصيلها

يمكن الغالبية العظمى متعرفش انا كنت فين ..

كله هحكيهولكم فلاش باك باذن الله

انتظرونى فقط لما اروق

لانى رجعت من كام يوم بس مش مرهقة

ومحتاجة ارتاح شوية

وكل سنة وانتم طيبين

كييف زبـــــ!لة حضرتك ؟

للأسف أنا اللى دخلنى أكتب دلوقتى
إنى قاعدة بسمع إسطوانة
الإسطوانة دى إشتغلت فجأة من غير أى مقدمات
ولا إحم ولا دستور
ولا صوف ولا كستور
الإسطوانة ليها ولا ييجى نص ساعة شغالة
بجد حاجه تخلى الواحد فخور جدا
والإسطوانة دى من تأليف واداء وألحان و توزيع وكلمات جارنا س
الاسطوانة دى بقا عبارة عن اييييييييييه

اجاركم الله

وابل من الشتايم الدسمة جدا جدا
شتيمة من اللى تسمعها تفتكرها رصاصة خرمت طبلة ودنك
الراجل مش راضى يسكت
وده طبعا بعد العرض الظريف اللى إتعمل بين إتنين من رجال المنطقة ..
القصة من الأول
جارنا س ساكن فى اخر دور فى العمارة اللى قصادنا .. جميل
الراجل ده نضيف وكتر خيره انه بيهتم بالنضافة
اللذيذ ان فى ناس اتفقت بدون قصد تعمل تحت شباكه مقلب زبالة
اه فى ناس ساكنة فوق المكان المفترض انه بقا مقلب زبالة
بس ايه يعنى يا راجل عادى جدا
ناس ايه واحنا بيهمنا ناس ولا جن ازرق
المهم نفسنا وبس
هنودى الزبالة فين يعنى
يلا نتعاون و هما يتحملوا شوية مش جيران برضه
بجد مش حاجه تحرق الدم ؟؟
المهم ان الواحد بقا يصحى الصبح بدرى الواحد يبقى واقف فى الشباك شايف الكل بيجرى عشان مصالحه
اللى شغل و اللى مدرسة واللى مصلحة هيقضيها
وتلاقيهم متلمعين وعلى سنجة عشرة
وفى ايدهم شنطة سودا
ياترى ليييييييييييييه
هى الشنط السودا بقت لزوم الغموض و الشياكة و المظهر الجذاب.. ؟؟
اكيييييييييد
بس الشنطة هنا مختلقة
مختلفة ليه بس
ممممممم أصل هى بصراحة مش لزوم الشياكة

أمال أيه ؟؟؟
هى لزوم الزبالة

زبالةةةةةةةةةةةةة ؟
طبعا زبالة
الشنطة السودا دى فيها زبالة
وليه يا ترى؟
ما احنا اتفقنا ان الزبالة اللى بنرميها تحت الناس دى بقت روتين
إزاى نعيش بدون روتين،، ازاى نعيش بدون زبالة
المهم ياعينى صاحبنا س ده كان يقعد يزعق و يهلل من اخر دور ان الناس تحترم نفسها ..!! أبدااااااا
دم انجليزى .. ده لو كان فى دم يعنى
وبقا يفضل صاحى من الفجر عشان يشوف مين بيرمى الزبالة تحت بيته
ويرش ميه
ويزعق و يشتم
مفييييييش فايدة
الراجل زهق و بقا يشد فى شعره
واخر ما غلب حماره نزل يشيل الزبالة بنفسه
بقا يكنس الشارع بنفسه
ويلم الزبالة
او يروح مشوار يجيب زبال يلم البلاوى دى
ويدفع هو من جيبه ..
طيب ليه بس الناس وحشة كدا
وياريت عاجب
اليوم بقا بيكنش الشارع كعادته
قام واحد تانى ص جارنا برضه لقا الزبالة بتقرب من المحل بتاعه
مسك مقشه و طلع يتخانق
افتكرته طبعا هيتخانق مع الزبالة
طلع بيتخانق مع جارنا س عشان بيعزم عليه بشوية زبالة
!! .. وهو مش ناقص
المهم مقشة من هنا ومقشة من هنا الخناقة ولعت
خناقة ع الريحة
وجه ابنه وشا ف ابوه بيتخانق يعمل ايه ؟

قالك اسيبه ابقى ندل

ادي للراجل كلمتين يمكن يتلم وهات بقا شتيمه وسب دين وحاجه تقرف بجد

شتايم مش ممكننننننننن
وكلام فظيع ،، يعبر عن غضب س من سوء اخلاق و سلوك الشعب
وصدمته فيه
ده الشعب طلع كييف زبالة
مفيش حته فى البلد وسيبوها نضيفة ابدا .. طيب ليه كدا
مش هما اللى بيتأذوا برضه ؟؟
طيب لو هو متأذاش ،، مهو اللى هيتضرر مش حد غريب
ده جارك حبيبك اللى وصاك عليه حبيبنا كلنا النبى عليه الصلاة و السلام
ولا اخوك ولا ابوك ولا ابنك ..
طيب ليه ؟؟
نفسي اعرف بجد ليه
ليه برغم الجهود اللى بتتعمل فى البلد عشان تبقى نضيفة ومشرفة
بنسعى بكل جهد لخرابها من تانى
تلاقى الحى راقى جدا و نضيف و الناس مستويات
والواحد ماشى الصبح اخر شياكة .. بس لازم البؤجة
اللى هيلعب بيها " بؤجة سلة " ويتخلص منها فى اقرب رصيف
سلوك مقزز جدا
سلوك مش من الدين
واللى بيعمل كدا مش عارف انه هياخد ذنب كبير ..
لان النظافة من الايمان .. يعنى انت شخص منعدم الايمان لو عملت كدا
واماطة الاذى من الطريق صدقة
شوف انت بقا لما تعمل عكس الصدقة
مش حرام !!
مش حرام عليك تهد اللى بنحاول نبنيه
وياريت اللى بيبنى بيبنى لنفسه
لا
اللى بيساعد بيساعد للكل
واللى بيهدم بيهدم على الكل .. وأولهم نفسه
ياما شفنا أرصفة مليانة زبالة
شفنا شوارع نضيفة جدا وفى أماكن محترمة
لكن واضح أن سكانها مش محترمين ..
بجد حاجة تكسف
تخيل ان انت قاعد فى بيتك وعمال تاكل وترمى جنب الكرسي مثلا
وكل ما تاكل ولا تستعمل منديل ولا ورقة ترميها جنب الكرسى فى نفس المكان
فى حين ان بيتك زى الفل ..
ويجيلك ضيف فجاة .. هتحس بأية ؟
وهيبقى شكلك أيه ؟؟
دمك هيروح فين ؟؟
ده حالنا فى بلدنا قدام ضيوفنا
العرب و الغرب
نتكسف قدام الناس
وملناش حجة أمام الله
الله سامحه و يهديه
كل واحد كييف زبالة
ياريت لو نهتم شوية بمظهرنا
مظهرك مش بس لبسك و شكلك و مكياجك
مظهرك هو سلوكك واخلاقك و قواعد دينك اللى انت ملتزم بيها
مظهرك هو بيتك .. اللى بيعكس صورتك فى عيون الآخرين
أسأت لوطنك أسأت لنفسك ولذاتك
ياريت لو نبطل العادة دى
مفهاش حاجه يعنى كام جنية لعامل النظافة وه هيحل المشكلة
ومنها هيسترزق
متبخلش على نفسك ب5 جنية وتجيب لنفسك و لغيرك المرض اللى يتعالج بالافات

ودلوقتى هتشوفوا بعض المشاهد الحية .. لشعب كييف الزبالة .

وقولولى .. هل ترضوا تكون دى

صورة مصر فى عيون الاخرين .

خناقةةةة خناقةةةة

لييييه يا ترى ؟؟

يا هل ترى ؟؟؟

ايه شعورك لو سمعت واحد بيزعق ؟

ايه شعورك لو كانوا اتنين ؟

إنت قاعد فى بيتك و فى حالك ،، وفجأة بتسمع إتنين مسكوا فى خناق بعض فى الشارع ..

طبعا هتجرى جرى تبص من البلكونة .. أكيد مش الكل كدا لكن المعظم

و أنا بتكلم عن المعظم

ده تصرف ناس كتير جدا وقت ما بتسمع خناقة فى الشارع

مش عارفة ايه السر فى ان الناس بتحب تتفرج على الخناقات من البلكونة

وتطلع تكتشف ان مش لوحدك اللى فضولى

كل البلكونات مليانة وكانه بقا استاد

اللى واقف بالشورت واللى بالبيجامة واللى ..... إحم بالفانلة

معنى ده انهم كانوا مثلا نايمين أو قاعدين آخدين راحتهم أوى وطلعوا بس يشوفوا الخناقة

طيب طلعت ليه ؟ ايه اللى يهمك ؟

طالما مش قريبك اللى بيتخانق ولا حد تعرفه ؟

أانا مش هخبى عليكم ، أنا كمان عندى فضول يخلينى اتفرج على الخناقات

إلا لو كان فيها ألفاظ مش حلوة

بيبقى هاين عليا ارمى عليهم جردل مياه

المهم ان فى ناس كتير كدا

ممكن اكون بكلم واحدة من صحباتى على المسنجر أو الفون

وتقولى إستنى هشوف الخناقة وآجى

طيب ليه ؟

لو كان ده شعور فردى مكانش يبقى فى مشكلة

انما المشكلة انه تصرف اغلب الناس .. فالموضوع اثار انتباهى حبيت اعرف

ليه الناس بتهتم بالشكل ده ؟

هل عشان الشعب المصرى شعب ودود شويتين

فبيستغرب لو شاف مشكلة

او يحب يشوف يمكن يقدر يساعد؟

او عنده فضول يعرف السبب اللى يخلى الناس ممكن تتخانق وتزعق

وتفرج عليها الشارع كله بالشكل ده ؟

او يمكن عشان الحياة بقت مملة اوى وكلها روتين

فمابيصدق يشوف أكشن فى اليوم

ويمكن لكل واحد أسبابه

فلو انت من الأغلبية

ياريت تقولنا أسبابك

اللى ممكن تدفعك تسيب اللى فى ايدك

علشان تتفرج على خناقة

!!

كل سنة وانتم طيبين

!!.. غريبة .. إحنا لسه عايشين

بصراحة الشعب المصرى أثبت أنه فعلا بطل

ويتحمل ما لا يتحمله الجبال .. والغريبة انه

فى ظل كل همومه وحمولة الثقيلة بيظل راضى وسعيد

وبيقدر يضحك كمان :)

**

*

الشعب المصرى متحمل ضيق ذات اليد

وما يترتب عليه من الفقر و الذل و ساكت

هيعمل ايه .. غير انه يمارس

نفس الرياضة الموروثة عن الآباء و الأجداد

وهى الجرى

!! ... ورا لقمة العيش

وفى نفس الوقت لو بصينا لمصر كموقع استراتيجى هنعرف انها دولة غنية جدا جدا جدا

معنى كدا ان المعادلة غلط ..!

دولة غنية = شعب فقير ..

ازاى ؟؟؟؟؟

كم دولة تانية معندهاش نص الموارد اللى عندنا

وشعبها غنى جدا ومرفه

**

*

دول معندهاش مزارات سياحية زى مصر

معندهاش مزارات دينية زى مصر

معندهاش موانى مهمة زى مصر

معندهاش قناة سويس زى اللى عند مصر

معندهاش عقول عبقرية وشعب ياكل الظلط زى شعب مصر

طيب ليه هما شعب غنى واحنا شعب فقير ؟

( طبعا احنا عارفين ليه (; بس مش هنقول لحد )

ومع ذلك أدينا عايشين

وبنقدر نجيب كل اللى احنا عاوزينه

عشان فى طموح .. ويمكن فى أمل

آه مش كله بيتحقق

!!.. وبرضه من غيره عايشين

-------------

الشعب المصرى بطل ليه ..

لانه عايش فى بيئة غير صالحة للمعيشة الآدمية .. ولسه عايش

جو ..مفيش تلوث اكتر من كدا

ارض .. مفيش مساحات اقل من كدا ولا تكدس اكتر من كدا

مياه .. مفيش تعفن و تلوث و قرف أكتر من كدا

أكل .. مفيش اكل مسرطن من قبل ما يتزرع اكترمن كدا

مرض .. مفيش امراض اكتر و اصعب من كدا

.......

عمرى ما شفت اطفال بتتولد بالسرطان

قليلا ما تشوف بيت مفيهوش واحد مات بالسرطان

عمرى ما شفت ناس مسئولة بتستورد السرطان

ده غير الامراض التانية المنتشرة اكتر من الذباب

زى الكبد و الضغط اللى بقا سمة كل مواطن و القلب و الأعصاب

وده بخلاف الأمراض النفسية والعصبية اللى 3/4 الشعب مصاب بيها

---

عمرى ما شفت بلد عندها نهر من الجنة .. ونص شعبها عنده فشل كلوى

ومية الشرب فيها مُعَفَنَة ومش نقية ولا نضيفة ولا ريحتها تشجع الواحد إنه يشرب أصلاً

مهما حطوا فيها كلور

المية أشبه ما تكون مستعملة من قبل و جابوها وغسلوها و رجعوها للحنفيات تانى :(

:((

---

عمرى ما شفت بلد معرفتش تخلص من الزيادة السكانية إلا بسرطنة الشعب

نجيبلهم أكل مسرطن خليهم يموتوا و يريجونا إحنا لسه هنعالجهم .!

طيب عالجوهم مهو بفلوسهم برضه

---

" مكتوب على بابها " ادخلوا مصر أن شاء الله امنين

!!.. علشان إنتم مش عارفين إن الأمان خلص جوه

وبرغم كل ده .. فى ناس لسه كويسة

ويمكن عشان كدا

!! .. احنا لسه عايشين

******

كترت الناس

عنست البنات

هاجروا الشباب

وكل ده ليه ؟

---

بصراحة لسه الكلام مخلصشي

لسه كتير و كتير وكتير

لكن أنا عاوزة أقول إنى بقول كل ده من حبى لبلدى

عمرى ما سخطت عليها فى يوم

لأنى عارفة وواثقة إن هى ملهاش ذنب فى اللى بيحصلنا

دى هى أول المظلومين

***

عموما برضه فى يوم من الأيام هيترد لكل مظلوم حقه

حتى لو كان ده يوم القيامة

ولكن تفتكروا من هنا ليوم القيامة

هنكون لسه عايشين

!!!

أخانقك آه ،،، أسيبك لا

من حق كل زوجة أن تغضب

... ومن حقها أن تعبر عن سخطها و غضبها

ولكن عليها دائما أن تحتفظ بخط رجعه فى خناقاتها الزوجية

لحماية علاقتها بزوجها مهما إستفحلت الأمور بينهما

***

**

*

...فهى يمكن أن تنشب خناقة مع زوجها لتصفية بعض الحسابات

و المواقف و لكن ليس عليها أن تكسر جسر الود بينهما

.ومن أجل ذلك ننصح كل زوجين بضرورة الحرص على الإحتفاظ

بمساحة من العلاقات الودية حتى فى أثناء الخناقة

لأن هناك أزواج يصلوا إلى منتهى العراك بينهما فى خناقة واحدة

قد تنهى كل شىء ولا تترك فرصة لبداية طيبة

***

**

*

.وتعتبر الخناقات الزوجية من أهم المؤشرات التى تنبىء

بإمكانية بقاء الزوجين معا أو إحتمال إنفصالهما

فالزوجان الذان يحافظان على مساحة من الود بينهما

أثناء الخناقة مع بعض السخرية و المرح فلا خوف

على علاقتهما من الفشل

***

**

*

أما الزوجان الذان يقطعان قطعًا فاصلاً بين الخناقة و ذكرياتهما

السعيدة السابقة و يصلان إلى طريق مسدود بتعنتهما

و عنادهما ومكابرتهما و تبادل الشتائم بينهما

فعلاقتهما مهدده بالفشل القريب

***

**

*

: فعلى الزوجة الذكية أن تجيد أصول لعبة

الخناقة الزوجية و عليها أن تطرح هذا التساؤل

كيف أتعارك بمودة ؟

فعلى الزوجة أن تدخل الخناقة الزوجية لتحقق

غرض معين

وهو أن يعرف زوجها أنها على حق

(إذا نشب الخلاف بدون قصد )

ولكن يجب أن تهتم بحبها لزوجها

وليس من على خطأ و من على صواب

زوجك سيكون على إستعداد للحديث معك

عن سبب الخناقة و وجهة نظره فيها

،، عندما يشعر فعلا أنك على إستعداد للإستماع إليه

فاظهرى رغبتك له فى الإستماع لرأيه

وقد تلجأين إلى إستخدام بعض العبارات

التى تهدى من روع سوء التفاهم بينكما مثل

...رأيك صائب

..كنت أفكر فى هذا

..فكلمة طيبة منك قد تشعره بالهدوء

فتنتهى الخناقة بسرعة تقديرا لتعقلك

***

**

*

بعض الزوجات يشتعلن غضبا عندما يحاول الزوج

أثناء الخناقة إستخدام الفكاهة فى المناقشة

ولكن هذا ليس سيئا

..فهو من شأنه تخفيف حدة التوتر بينهما

وإعطاء كل طرف من أطراف النزاع الزوجى

مساحة للتنفس بحريه

و الزوجة الذكية تستطيع إيجاد المخرج

لزوجها أثناء الخناقة حتى يشعر بالإرتياح

***

**

*

وقد تلجأ الزوجة الذكية عندما تشعر بأن جو الغرفة

قد زاد تعصباً و توترًا إلى التوقف

حتى لا تشتعل الخناقة أكثر

وتفضل أن تعود للمناقشة

بعد هدوء الأعصاب حتى تكون المناقشة

مفيدة و مثمرة

***

**

*

وعلى المرأة أيضا ألا تتصيد لزوجها

كل صغيرة و كبيرة لتثور عليه

بل يجب أن تعطى لزوجها حيزاً معقولاً

من الأخطاء البسيطة

.

.

وإذا صممت على الثورة فلا تثور إلا عند الأمور الكبيرة

و الأخطاء الضخمة لتكون منطقية فى ثورتها

.

.

..وحتى لا يفقد إحترامه للخناقة نفسها

ويلجأ إلى عدم الإكتراث بها

***

**

*

يجب على الزوجة البارعة فى أصول الخناقة الزوجية

أن تتجنب الهجوم الشخصي

بل عليها أن تعرض سبب ضيقها بطريقة عاقلة

حتى يشعر بالندم فى داخله

ويحاول أن يتفادى ما يزعجها فى المرات القادمة

***

**

*

عليها أيضاً هذه الزوجة أن تتعلم النضوج

و التعقل و المنطقية أثناء إدارتها للخناقة الزوجية

حتى تتحكم فى مساحتها و حدودها

..فالهدف من الخناقة أن يصل الزوجان إلى الحلول السليمة

والكفيلة بإنقاذ العلاقة الزوجية و ليس إشعالها أكثر

***

**

*

يجب عليها أيضاً ملاحظة لغة جسدها أثناء المناقشة

مثل (التلويح باليدين ) أو جحوظ العينين

أو (التبريق ) أوتحريك الرأس بصورة متشنجة

فهذه الحركات الغريبة قد تؤذى الطرف الآخر

أكثر من الكلمات الجارحة التى قد تصدر

منها أثناء النقاش الساخن

***

**

*

وإذا رأيت زوجك يطوى يديه و قدميه

و يلويهما أثناء جلوسه أو يهدل أكتافه

،، فاعلمى أنه جرح نفسياً منك

أثناء الخناقة سواء بالكلمة أو الحركة

ويعنى أيضاً أنك كنت عدائية

أكثر مما تظنين

..وهذا الجرح النفسي الذى أصاب زوجك

قد لا يندمل بسهولة

***

**

*

على الزوجة إختيار الوقت و المكان المناسبين

لبدء النقاش ،، فإذا كان يومك فى العمل طويلاً مجهداً

و منهكاً أو عانيت ما فيه الكفاية من شقاوة أطفالك

أو إرتفاع درجه حرارة الجو بشدة

فحاولى هنا أن تتجنبي

إنفلات شرارة الخناقة الزوجية ،، فهذا وقت

غير مناسب على الإطلاق

لأن أعصاب الطرفين مشدودة أصلاً ومتعبة

***

**

*

فحاولى أن تؤجلى بدء المناقشه إلى حين تشعرين

أنكما فى حالة أفضل نفسياً و عصبياً

حتى يؤتى النقاش ثمار الطيبة

ولا ينقلب ليكون إحدى العراقيل

أمام سعادتك الزوجية

***

**

*

عليها أن توفر مساحة من الإحترام بينهما

حتى ولو لم يحافظ عليها الطرف الآخر

نتيجة لعصبيتة و توتره

لأن المصيبة تبدأ عندما

يفقد الزوجان أعصابهما معاً

ويتصرفان بحدة و حماقة وتهور

!!.. ولا يحافظان على تبادل الإحترام

***

**

*

وأخيراً

على الزوجة الذكية أن تعلم أن الخناقة هى

ظاهرة صحية فى الحياة الزوجية

من أجل مزيد من التقارب والتفاهم والحب بينهما

وعليها أن تردد داثماً

أخانقك آه ...أخسرك لا

***